ភ្នំពេញ៖ នាយករដ្ឋមន្ត្រីកម្ពុជា សម្តេចតេជោ ហ៊ុន សែន ឱ្យដឹងថា សម្ដេចនឹងប្រើប្រាស់យុទ្ធសាស្រ្តដែលមានតែតួអក្សរចំនួនពីរ ដើម្បីបំបាត់ចោលនូវមនោគមវិជ្ជារបស់លោក សម រង្ស៉ី។

ក្នុងសន្និសីទសារព័ត៌មាន ក្រោយចុះឈ្មោះក្នុងបញ្ជីបោះឆ្នោតថ្មី នៅក្រុងតាខ្មៅ ខេត្តកណ្ដាល កាលពីព្រឹកមិញនេះ នាយករដ្ឋមន្រ្តី សម្ដេចតេជោ ហ៊ុន សែន ឱ្យដឹងថា ចាប់ពីពេលនេះ សម្ដេចនឹងប្រើប្រាស់យុទ្ធសាស្រ្ត ២តួអក្សរ IF ជំនួសឱ្យយុទ្ធសាស្ត្រ ៥តួអក្សរ DIFID វិញ។ ក្នុងនោះសម្ដេចថា គឺដើម្បីកម្ចាត់នូវមនោគមវិជ្ជាជ្រុលនិយមរបស់ លោក សម រង្ស៊ី។

សម្ដេចថា៖ «កាលពីមុនខ្ញុំប្រើ ៥តួអក្សរ Device Isolate Finish Integration និង Development ប៉ុន្តែលើកនេះខ្ញុំប្រើតែពីរតួអក្សរទេ គឺ IF តែម្ដង បានន័យថា Isolate ហើយគឺ finish ចោលតែម្ដង។ អាហ្នឹងគឺខ្ញុំបញ្ជាក់ពីយុទ្ធសាស្ត្ររបស់ខ្ញុំ»។

ជាមួយគ្នា នាយករដ្ឋមន្រ្តីកម្ពុជា បានគូសបញ្ជាក់ថា ការធ្វើដំណើរទៅតាមខេត្តចំនួន ៤នាពេលខាងមុខ ក៏សំដៅរៀបចំនូវបណ្ដាញដើម្បីកម្ចាត់អង្គការចាត់តាំងលើមនោគមវិជ្ជាជ្រុលនិយមដែលបង្កើតឡើងដោយលោក សម រង្ស៉ី ផងដែរ។

យ៉ាងណាមិញ សម្ដេចក៏បានអំពាវនាវដល់សម្ព័ន្ធមិត្តបរទេស ឱ្យពិចារណាវាយតម្លៃប្រកបដោយភាពត្រឹមត្រូវ លើបញ្ហានេះផងដែរ។

សម្ដេចថា៖ «ខ្ញុំសុំឱ្យមិត្តភក្តិបរទេសទាំងឡាយ យល់ឱ្យច្បាស់ពីចំណងទាក់ទង ថាហេតុអ្វី បាននាំដល់រឿងនេះ។ សូមស្ដាប់ខ្លឹមសាររបស់គេ និងអ្វីដែលជាទង្វើរបស់គេ»៕

^{PHOTO: KOK KY}